Had lmawdou3 moujoud 7ta bellougha lfaransia

Hderna 3la l7ala lmouzria dial Sa7et Al Amal fl blog dial Agadir bellougha lfaransia, ou simana lfayta chefna rah lisla7at bdaw l7amdoullah !

Be3da li7addi l’aan, le7fari lekbar lli ta7 fihoum ch7al men wa7ed ou kanou tay cheklou khatar 3la drari sghar tghettaw beremla ou le7jer, fi intidar iddar lihoum sima ou lfinision…

Lmouchkila dial lemdina houa anna siana dial Sa7et Al Amal matalan, mes’oulia dial l’Wilaya, machi l’Baladia… Ou 7naya ka mowatinine ma3arfinch fin tay bdaw ou fin tay saliw lmaham dial koulla mesla7a, b7al l’Majlis lbaladi, l’Wilaya, l’3amala, l’Bachawia…

Wa7ed l7aja lli nebghiw, houa ikounou salaw l’aachghal 9bel men fasel sif ou Mehrajane Timitar !

• 4 dial t3li9at

Wa Akhirane, hahoua site dial Agadir bel3erbia Darija ! Fhad lpost louwlani, ghadi nhedrou 3la lblanate lmeziyanine dial Ramdane ! Koulchi tay tchehha f’Ramdane walakine kayn lli zoufri, kayn lli mamsalich bach inseb ch’hiwate ou kayn lli mzewwej mra ma 7adgach :D. Ma3lih idane ghir belmakla dial zen9a !
Bla matchekkaw, rah kaynine chi fennana dial l7rayr ou chbakia ghadi isektoukom !

L’majestic f’Talborjt, gdam lparking dial Jame3 Mohammed Alkhamis :

B’Ramdane ou bla Ramdane, L’majestic khatér ! Fel yamat l3adia, tay koun restaurant che3bi fih wa7ed loubia bel7em ghalia chwia walakine ldida bzayd ! Ou fellil tay dir l7rira, lemsemmen, l7ercha, lbid meslo9, chebakia… ou top 3endou houma les “ném” (oula cigare)
dial l7out ou che3ria d’chinwa. Idane : f’Ramdane 3ouwlou 3la makla zina 3endou !

Amsernat :

Ila kentou jayine men Lekhyame, foutou 9a3t l7afalat lli 7da sou9 ou 7diw l’imen dialkoum. Ghadi iban likoum wa7ed moul l7rira
fchouka. 3endou 7rira felmostawa, chbakia 3la lachkal ou lanoua3, ou tay dir 7ta sfenj ou lbeignet.

Sa7et Tamri :

Sa7a lli yallah tsel7at fiha testifa dial l9hawi koulhom 3endhoum lmenu fih lli 7eb lkhater ! Kaynine 3awtani en face lbeya3a ou chraya dial lmarché, l3awasir, lkhoubz, ptipanat, msemmen, lbeghrir, ou zid ou zid !

9ehwat Yacout :

Hnaya lmenu ghela men l9hawi lokhrine, le7rira tadir ga3 3echrat drahem, walakine khfifa, m7amda ou ldida ! Lgelsa mouri7a ou lkhdoura dayra belma7al, ghir serbis lli na9es chwia. Walakine le7lawi dial louz, zenjlane, zher ou le3sel tay 3emrou l3in 9bel lkerch !

Jour et Nuit :

Men dima f’Jour et Nuit tay 3tiw leftour ll’me7tajine ou ll’kliane l7rira bla 7sab. Leftour Hnaya zine tahoua, 9ddam leb7er ou chems gharba !

Iwa ach ban likoum daba, ndirou chi gelsa ? Imta ghadi t3erdou 3lina ?

• 10 dial t3li9at